Gåve frå Sogn Sparebank til HMM Helsehjelp Ukraina

Me er glade for å kunne informere våre kundar om at Sogn Sparebank har beslutta å gje ei gåve på kr 1 208 000 til HMM Helsehjelp Ukraina. I tillegg matchar Bjørkehagen AS, vår største investor og eigenkapitalbeviseigar, same beløp.

Det var vår nestleiar i styret, Sindre Wergeland, som foreslo denne gåva. Han lova samstundes å matche gåva frå banken med same beløp frå sitt eige selskap, Bjørkehagen AS. Gåva er mellom anna øyremerka uttrykningskøyretøy som skal brukast til å frakte skadde soldatar til næraste mobile evakueringssjukehus.

Tysdag 18.mars blei gåvene på kr 1 208 000 frå kvar av partane overrekt til HMM på vårt kontor i Bergen i samband med styremøtet. Alle som ønskte det, fekk ein gjennomgang av HMM sitt arbeid, og det gjorde utan tvil inntrykk å sjå videoar frå fronten og korleis hjelpearbeidarane kontinuerleg jobbar for å redde liv.

Om HMM Helsehjelp Ukraina

HMM Helsehjelp Ukraina er ei bergensbasert stifting som sidan krigen starta har spesialisert seg på å levere livreddande utstyr og medisinsk hjelp til soldatar på fronten i Ukraina. Dei rører ingenting som kan brukast i offensiv krigføring. Målet er å redde flest mogeleg liv og hjelpe skadde soldatar, slik at dei kan delta i gjenoppbygginga av landet og leve eit verdig liv etter krigen. Stiftinga har også arbeidd med å skaffe mobile tannhelseklinikkar, som er viktige for å oppretthalde tannhelsa til soldatane på frontlinja. Lange periodar i skyttergravene med usunt kosthald og dårlege tannhelserutinar har ført til store negative konsekvensar for mange soldatar.